كيف يكون شعورك ؟

0 295

فكري قاسم

كيف يكون شعورك وانت ماشي في الشارع والحياة من حولك حلوة وماشية بانظباط والناس عايشه ومبسوطة ، والزمن يمشي بسرعة وانت هاذاك انت واقف مكانك مراعي للمهدي المنتظر ؟
كيف يكون شعورك والعالم من حولك كل يوم يتطور اكثر واكثر
والحياة كل يوم تخرج للناس باختراع جديد وانت مجرد مستهلك مطنن ومراعي للمهدي المنتظر؟
كيف يكون شعورك وانت ماشي في الشارع تفكر بحالك ذاك
وتقول ياربي ايحين باننطلق الى الحياة العصرية زيما بقية خلق الله ؟ وفجأة ينبع لك الى وسط الشارع إنسان آلي ماسك في يده حجر ساع راسك ويمنعك انت وبقية المارة كلهم من عبور الشارع
وما بلا والا يرجعك معه ريوس 1500 سنة والا انت غريمه وحرام مايبقى في الشارع راس سلم !
وغصبا عنك وعن اهالي اهلك مابلا والا والا ترجع معه الى غبار التاريخ والا انت خصمه وغريمه وعدو الله المرتقب .
كيف يكون شعورك امام كل هذا ؟
تطنن والا ما تطننش ؟
اكيد تطنن
وهذا تحديدا هو حالنا مع عبد الملك الحوثي
ذلك المجنون الذي نبع لنا من داخل كهوف مران وهو مبندق وعقيدته انك عدوه اللي تستر على قتلة علي بن ابي طالب !
وانت غريمه اللي تواطىء مع سفك دم الحسين!
وأنت خصمه الذي يشتي منك هاذيك الساع تخرج له عمر ومعاوية وابوبكر من كل بيت في كل مدينة وحارة وقرية وإلا حرام مايسلم راس .
ايواااااه
– تقوله ياخي احنا الان في زمن غير الزمن وعلي ومعاوية وابو بكر وعثمان والصحابة اجمعين رضوان الله عليهم كلهم قد شبعوا موت
– يقولك لا لا لا
رضوان الله على علي بن ابي طالب بس ، والبقية مماسيخ ومع العدوان !
– تقوله طيب ياخي اطرح البندق من يدك وتعال نتفاهم هكذا بالعقل وبالمنطق ماهو الذي تشتيه بالضبط ؟
– يقولك اشتي غرماء علي وفاطمة ودم الحسين والله مايسير هدر !
تقوله ياخي هاذاك كان تاريخ ، زيه زي أي حوادث التاريخ التي حصلت في الماضي ليش تحوله الى عقيدة والى دين ؟
– يقولك استغفر الله ياذاك انت عميل لأمريكا واسرائيل
تقوله العن ام امريكا واسرائيل واللي خلفوهن الثنتين ، وتحاول تفهمه تقنعه انك مواطن يمني تشتي تمشي الشارع بأمان وتروح بيتك ومعك لقمة للجهال ومصاريف دراستهم
– يقولك ولممه ما تدرسهم ملازم سيدي حسين ؟ مادخلين عينك او مه ؟
تقوله ياخي احنا الان في القرن الواحد والعشرين والناس الان يشتوا ماء وكهرباء وتعليم وصحة ووظائف ورواتب وقانون يسير شئون الحياة
– يقولك وهؤلا كلهن هلهن موجودات في ملازم سيدي حسين بدر الدين الحوثي .. انت اقراهن بس وكل شيء عيجي لاعندك لو انت متقي وداري ما قال الله ؟!
وقلك ليش احنا مطننين ؟!

اترك رد